30 டிசம்பர் 2009

மறுமுறை

நன்றி தெரிவிக்கும் பொருட்டு
நீட்டப்படும் கைகளை
நன்றாகவே பற்றிக்
குலுக்கலாம் நீங்கள்.

மறுமுறை வாய்க்காமலே
மறுதலிக்கப்படலாம்
மலர்ந்த முகத்தோடு பிரியும்
மற்றொரு சந்திப்பு.

19 டிசம்பர் 2009

செல்வராஜ் ஜெகதீசன் கவிதை தொகுதி வெளியீடு


நண்பர்களே,

எதிர்வரும் புத்தக கண்காட்சியை யொட்டி, எனது இரண்டாவது கவிதைத் தொகுதி
"இன்ன பிறவும்" கவிஞர் சுகுமாரன் அவர்களின் முன்னுரையோடு வெளியாகிறது.

நூல் விபரம்:

நூல் பெயர்: இன்ன பிறவும்
பதிப்பகம்: அகரம், தஞ்சாவூர்



கிடைக்குமிடம்:

டிசம்பர் 30 முதல் ஜனவரி 10 வரை நடக்கும் சென்னை புத்தக கண்காட்சியில்
அகரம் பதிப்பக ஸ்டால் மற்றும் சென்னை தியாகராய நகர் புக்லாண்ட்ஸ்.


அன்புடன்,
செல்வராஜ் ஜெகதீசன்.

10 டிசம்பர் 2009

ஆட்சேபணை

அடுத்த இருக்கையில்
வந்தமரும்
உங்கள் வருகையில்
ஆட்சேபணையேதுமில்லை.

இடையிடையே
இடித்தபடி இருக்கும்
உங்கள் கைகளைக்
குறித்து நீங்கள்
கவனம்
கொள்ளும் வரை.

o

அனுகூலம்

ஆறேழு பேர் நிறைந்த
சந்திப்பொன்றில்
அதைப் பற்றி
நீயும் பேசவில்லை
நானும் கேட்கவில்லை

இருவர் மட்டுமே
அறிந்த விஷயமென்று
இருப்பதில் உண்டு
இப்படி ஓர் அனுகூலம்.

o

அடையாளங்களை அழித்தல்

அடையாளங்களை
அழித்தொழிப்பதில்
நீங்கள்
ஆகச் சிறந்தவராய்
இருக்கலாம்.

படிப்பதற்கென்று
பெற்றுப் போன
புத்தகத்தின்
பக்க மடிப்புகளை
மாற்றிப்போடுவதிலுமா
அதைப்
பரீட்சித்துப் பார்க்கவேண்டும்?

o

இன்று வரை

நிச்சயமாய்
தெரியுமென்றாலும்
நீண்டு
கொண்டுதான் இருக்கிறது
இன்று வரை.

ஏதாவதொரு
கையசைப்போ
எதிர்கொண்டழைக்கும்
முகமொன்றுக்கோ
ஆன ஏக்கங்கள்.

O

09 டிசம்பர் 2009

விளம்பரங்களில்

விளம்பரங்களுக்கிடையில்
வந்து போகின்றன
விளம்பரதாரர் வழங்கும்
நிகழ்ச்சிகள்

நல்லது பயக்குமெனில்
நல்லது கறையென்கின்றன

இன்னுமதிக வெளுப்புக்கு
இவையிவை என்ற
அறிவிப்புகளோடு

இலவசங்களுக்கான
சீசன்களை
எப்போதும்
நினைவுறுத்திக்கொண்டு

விளம்பரங்களில்
வகுபட்டு
பின்னமாகிக் கொண்டிருக்கிறது
பொழுதுகள்.

o

30 நவம்பர் 2009

சுருதி லயம்

பிரிந்து கூடும்
கூடிப் பிரியும்
அநேகர் வரவை
கண்டிருந்த
அந்த இடம்

கால தேச
எல்லைகள் கடந்து
பதினோரு
வருடங்களுக்குப்
பின்னிகழ்ந்த நம்
சந்திப்பின்
களமாய் இருந்தது
அன்றைக்கு.

கூடிப் பேசிக்
கழித்ததில்
குறையொன்றுமில்லை
மறைமூர்த்தி கண்ணா.

ஆயினும்
அன்றைய நம்
முகங்களின்
அறிமுகத்தோடு நாம்
ஆரம்பித்திருந்தால்

சுருதி சற்று
கூடியிருக்கலாம்
நமதந்த
இசைக் கச்சேரியில்.

O

மீட்டாத வீணை

இங்கிருந்து
போயிருந்த
என்னைப் போலவே
அங்கிருந்து
அவர்கள்
வந்திருந்தார்கள்.
அவரவர்
இடங்களைக் குறித்தே
அதிகமும்
பேசிக்கொண்டிருந்தோம்
அயர்ந்து
திரும்பும் வரை.
தன் பொருட்டும்
ஏகும் விரல்களுக்காக
மீட்டாத வீணையென
காத்திருக்கும்
மீளாத் துயரில்
அந்த இடம்.

o

14 நவம்பர் 2009

வயிறு

இரவு கண்விழிக்கும்
இளங்காலைப் பொழுதொன்றில்
ஒல்லி தேகத்தின்
ஒட்டிய வயிறோடு
சாலையோரக் கால்வாயை
சுத்தப்படுத்திக்கொண்டிருந்த
சிலரோடு
கார்களைக் கழுவிக்கொண்டிருந்த
ஒருவனையும்
பார்த்தபடி
போய்க்கொண்டிருந்தேன் - அந்த
பூங்காவை சுற்றி
பெருத்த வயிற்றின்
சுற்றளவில் - ஒரு
இன்ச்சாவது குறைத்துவிடும்
உறுதியோடு.

o

08 நவம்பர் 2009

மிதந்தலையும் வெண்ணிறப் பறவை

01

தூக்கி எறியுங்கள்
உங்கள் தம்புராக்களை
தூளியில் உறங்கும்
சிசுவின்
தூக்கம் கலையும் முன்.

o

02

பறத்தல் என்பதைத் தவிர
வேறெந்த முகாந்திரம்
இருக்கப் போகிறது
வெளிர் நீல வானில்
மிதந்தலையும் அந்த
வெண்ணிறப் பறவைக்கு.

o

03

இங்கிருந்து
கொடுக்கப்பட்டவைகளே
எல்லாம் என்றிருக்க
எதைக் குறித்து
சொல்லிக் கொண்டலைகிறோம்
நான் நானென்று.

o

05 நவம்பர் 2009

கவிதை-பத்து

முதலாவது
எது குறித்தென்ற
தெளிவு வேண்டும்.

இரண்டாவது
இதுவரை இதுபோல்
இல்லாதிருக்க வேண்டும்.

மூன்றாவது
முந்தையவற்றிலிருந்து ஓரடி
முன்னே போக வேண்டும்.

நான்காவது
நாளை எங்காவது
பேசப்பட வேண்டும்.

ஐந்தாவது
அதுவாய் இறங்கி
வரவேண்டும்.

ஆறாவது
அடுத்தவரைக் கவர
ஆகிச் செய்ததாய்
இருக்கக் கூடாது.

ஏழாவது
ஏதாவது தொக்கி
நிற்றல் நலம்.

எட்டாவது
எதையாவது அதுவே
சொல்லவேண்டும்.

ஒன்பதாவது
ஓசை நயமிருத்தல்
ஒன்றும் குற்றமில்லை.

பத்தாவது
பிறந்த கவிதை
கொள்ள வேண்டும்
பொருத்தமான
தலைப்பொன்றும்.

o

[நன்றி: keetru.com]

26 அக்டோபர் 2009

விமான நிலைய வரவேற்பொன்றில்

பயணக் களைப்பாய்
இருக்கலாம்.

போய்வரும் இடத்தில்
நேர்ந்த உறவைப்
பிரிந்ததால் இருக்கலாம்.

எதிர்கொண்டழைக்க
எவருமற்று காணும்
புது இடம் குறித்த
மிரட்சியாய் இருக்கலாம்.

ஏக்கமும் சோகமும்
கொண்டு எதிர்பட்டவனை
நோக்கி இதழ்க்கோடியில்
தவழ விட்டேன்
புன்னைகையொன்றை.

சற்றே சலனம் காட்டி
பின் சமாளித்து
போய்க்கொண்டிருந்தவன்
நினைத்திருக்கக்கூடும்
ஏதும் என்னைப் பற்றி.

இறுக்கிப் பிடிக்கும்
வாழ்க்கையில்
இன்னொரு முகத்தின்
சோகத்தை இம்மியாவது
இடம்பெயர்க்க
முடிந்ததென்ற
நிம்மதி எனக்கு.

o

இயல்பாய் இருப்பதில்

ஆண்களேதுமின்றி
அழகிய பெண்ணொருத்தியோடு
ஆறேழு மாடி வரை
பயணிக்க நேர்ந்திருக்கிறது.

இடைவிடாமல் பேசிக்கொண்டிருந்த
இரண்டு பெண்களுக்கிடையிலும்
இருக்க நேர்ந்திருக்கிறது
எத்தனையோ முறை.

முழுக்கவும் பெண்கள் சூழ
மேற்கொண்ட பயணங்களுமுண்டு.

ஆகக்கூடி வாய்த்த
அத்தனை லிப்ட் பயணங்களிலும்
அடியேன் கண்டெடுத்தது
நண்பர்களே!

இயல்பாய் இருப்பதில்
இருக்கும் அத்தனை
சிரமங்களையும்.

o

13 அக்டோபர் 2009

நிரப்புதல்

காலி அட்டைப்பெட்டியை
சுமந்தபடி
கடைவீதி வழியே
போய்க்கொண்டிருந்தேன்.
காண்போர் அனைவரும்
அதில்
இட்டு நிரப்பிக்கொண்டிருந்தனர்
தமக்கானவற்றை.


o

இப்போது

முன்பெல்லாம்
பயண ஏற்பாடுகளில்
முருகர் படமிருக்கும்.
மொபைல் சார்ஜர்
முந்துகிறது
இப்போது.

o

சம்பவம்

பேச்சு
சுற்றி
சுழன்றதொரு
சம்பவத்தைப் பற்றி.

அக்கம் பக்கம்
குறித்தெந்த
அக்கறையுமில்லை
அவர்களிடம்.

சம்பவ இடம்
பற்றியும்
சரியான
தகவலில்லை.

பேச்சின்
சாரத்தை வைத்து
சம்பவத்தை அறிதலும்
சாத்தியப்படவில்லை.

உயிரிழப்பு ஏதுமில்லை
என்றொலித்த
வாக்கியமொன்றோடு
அங்கிருந்து கிளம்புகையில்
சற்று
ஆசுவாசமாயிருந்தது.

o

08 அக்டோபர் 2009

பதட்டம்

சகபயணி ஒருவன்
சட்டைப் பாக்கெட்டிலிருந்து
எடுத்த
மூக்குக்கண்ணாடியோடு
மாட்டிக்கொண்டபடி
வந்த பேனாவை மீண்டும்
சரியாகப் பொருத்தவில்லை - தன்
சட்டைப் பாக்கெட்டில்.

பதட்டம் கூடிக் கொண்டிருந்தது
பார்த்துக்கொண்டிருந்த என்னுள்.

o

05 அக்டோபர் 2009

எதிரொலி

பேசும் கிளி பொம்மையொன்று
வந்திறங்கியது வீட்டில்.
'சீக்கிரம் வா படி
சாப்பிடு சீக்கிரம்'
என்ற மனைவியின்
எல்லா அழைப்புகளையும்
எதிரொலித்துக் கொண்டிருந்தது கிளி.
தற்போது வேலை
தனக்கு சற்று குறைந்ததென
குதூகலித்துக் கொண்டிருந்தாள்
மனைவி.
எங்களுக்குத்தான்
எல்லாமும்
இரண்டு மூன்று முறை
எதிரொலித்தபடி.

o

என் வரையில்

உங்களைப் போல்தான்
நானும்
போகும் பாதை வழியே
திரும்பிக்கொண்டிருக்கிறேன்
தினமும்.
சுமந்து திரும்பும்
விஷயங்களில்தான்
சிறிது வித்தியாசம்
என் வரையில் அவைகள்
எண்ணிக்கையில்
சற்று குறைவு.

o

அப்படியொன்றும்

இரவின் அமைதியில்
மகனிடமிருந்து
வந்து விழுந்தன
வரிசையாக கேள்விகள்.
'பெரியவன் ஆயிட்டதால
சீனியர் கேஜி போய்ட்டனா' என்றான்.
ஆமாமென்றேன்.
'ஜூனியர் கேஜிக்கு பின்னே
சீனியர் கேஜியா' என்றான்.
ஆமாமென்றேன்.
'பெரியவனானப் பின்
சின்னவனாக முடியாதில்லை?' என்றான்
அப்படியொன்றும்
சொல்வதற்கில்லை என்றேன்.

o

26 செப்டம்பர் 2009

இந்நாட்களில்

வலிந்து நான் மேற்கொள்ளும்
இந்த வெஜிடேரியன்
பிம்பத்திற்குக் காரணம்
வள்ளலார் கதைகளோ
வேறெந்த வனிதையோ அல்ல.
வெள்ளையும் சிவப்புமாய்
வைத்தியன் கொடுத்து
வரும் மாத்திரைகள்.

o

முதலில்

முதலில்
யாரென்று
துயிலெழும்
மகனிடமிருந்து
தொடங்கும்
காலை.

உண்பது யார்
முதலில்
என்பதாக
காலை உணவு.

பள்ளிப்
பேருந்தில்
ஏறுவதும்
யார் முதல்
எனும்படியே.

(பள்ளியிலிருந்து)
தான் முதலில்
திரும்பிவிட்டதாக
தம்பட்டமும்
தொலைபேசியில்
தினம்.

நாளைய 'முதல்'களை
சுமந்து
நடுநிசி வரை
நடக்கும் போட்டியில்
நித்திரை கொள்வது
முதலில்.
நித்தமும்
நான்தான்


o

22 செப்டம்பர் 2009

பெயரிலென்ன இருக்கிறது?

இசையமைப்பாளராகும்
தன் மகளுக்கு
ராகத்தின் பெயர் வைத்த
நடிகர் ஒரு தீர்க்கதரிசி என்று
நடிகையொருத்தி சொல்லியிருந்த
பத்திரிக்கை துணுக்கை
படித்து சிரித்துக் கொண்டிருந்தேன்.
என்னவென்று கேட்ட மனைவியிடம்
எடுத்து நீட்டினேன் பத்திரிக்கையை.
இதிலென்ன சிரிக்க என்றவளிடம்
இதுவரை சொல்லவில்லை.
இனியும் ..........


0

05 செப்டம்பர் 2009

உல்டா

என் நண்பர்கள்
இருவர் குறித்து
மனைவி சொல்லிக்கொண்டிருந்தாள்
ஒருவன் உஷாரென்றும்
மற்றொருவன் சற்றே மந்தமென்றும்.
நானறிந்த வரையில்
அவைகள் அப்படியே
உல்டா என்பதுதான்
அதிலுள்ள விஷேசம்.

o

பிறந்த நாள் வாழ்த்து

சொன்ன நண்பன்
இதுவரை இருந்ததிற்காக
இருக்கட்டுமே என்றான்.
இதழ்க்கோடியில் சிரிப்போடு
இறப்பை நோக்கி
இன்னொரு அடிவைப்பதற்கா
இப்படி ஒரு வாழ்த்து என்றேன்.
இம்முறை மெல்லச் சிரித்தது அவன்.

0

பெண் கவிதைகள் மூன்று

பெண் - 1

நகைப்புடைவைக் கடைகளில்
பெண்கள் என்ற வரிகளோடு
தொடங்கிய கவிதையை
தொடராமலே வைத்திருக்கிறேன்
இன்னமும்.

0

பெண் - 2

இயற்கை கூந்தல் மணம் என்ற
வரிகளுக்கான கவிதையும்
இன்னமும் அப்படியே
இருக்கிறது கிடப்பில்.

0

பெண் - 3

குளிர்மழை நாளொன்றின்
குவாலிஸ் பயணத்தில்
மனைவியின் தோளில்
உறங்கியபடி இருந்த
மகனின் தலைக்குமேல்
சாலையில்
பேருந்து நிறுத்தமொன்றில்
கணநேரம் காட்சி தந்து
மறைந்த முகம்
கண்டிப்பாய்
அவளுடையதில்லை.

0

(நன்றி: Keetru.com)

31 ஆகஸ்ட் 2009

இணங்குதல்

அடம் பிடித்த மகனைத் தூங்க வைக்க
சொல்லி வைத்தேன்
குட்டி கேரம்போர்ட் ஒன்று
வாங்கித் தருவதாக.
இணங்கினால் ஒன்று கிடைக்குமென்ற
அவன் உலகத்திலும்
இணங்க வைக்கலாம் ஒன்று கொடுத்தால்
என்ற என் உலகத்திலுமாக
அப்படியே உறங்கிப் போனோம்
அடுத்த சில நிமிடங்களில்.



o

27 ஆகஸ்ட் 2009

விட்டுச்சென்ற

பத்து பதினைந்து பேர்
கொண்ட குழுவோடு
உணவு விடுதியில்
உண்டு முடித்து
பெரிய தொகை ஒன்றை
பில்லாகக் கொடுத்து
வெளியேறிப் போனவன்
விட்டுச்சென்ற
மாத்திரை உறைகள்
விளையாடிக் கொண்டிருந்தன
மின்விசிறிக் காற்றில்
மேஜையெங்கும்.

0

25 ஆகஸ்ட் 2009

பார்வைகள்

நண்பன் ஒருவனைப்
பார்த்துவிட்டு
காரில் திரும்புகையில்
கைபேசியில் அழைத்த
இன்னொரு நண்பனிடம்
'அப்படியே இருக்கான் மச்சி' என்று
சொல்லிக்கொண்டிருந்தான் நண்பன்.
முந்தைய தினம்
நான் இல்லாத நேரம்
வந்திருந்த இவன் குறித்து
என் அம்மா சொன்ன
'அப்படியே இருக்கான்டா'
சற்று நேரம்
நினைவில் வந்து போனது.


o

24 ஆகஸ்ட் 2009

கண்ணோடு காண்பதெல்லாம்

நகைச்சுவையும் உடல்நலமும்
என்றொரு புத்தகம் வெளியிட்ட
புகைப்படமொன்று இருந்தது
நீள் மேஜையில்.
காதைக் கிழிக்கும் சத்தத்துடன்
ஒளிபரப்பாகிக்கொண்டிருந்த
தொலைக்காட்சித் தொடரின்
அன்றைய எபிசோடில்
அடுத்தடுத்த
மாரடைப்பு சம்பவங்கள்.
அவ்வப்போது
திறந்து மூடிக்கொண்டிருந்த
அறைக்கதவு வழியே
கசிந்துகொண்டிருந்தது
அந்த இதய நோய் மருத்துவரின்
ஆர்ப்பாட்டமில்லாத
அமைதியான பேச்சு.

0

23 ஆகஸ்ட் 2009

தவிர்க்க விரும்பும் தருணங்கள்

எப்பொழுதும் வீட்டில் வைத்து
வெகுநேரம் பேசுபவன்
சமீப காலங்களில் சந்திப்பதெல்லாமே
வெளிவாசல்களில் என்பதை
நண்பனும் கவனித்திருக்கக் கூடும்.

சமீபத்தில் தவறிய அவன் அம்மாவை
போட்டோவில் மாலையோடு பார்க்கும்
தருணங்களை தவிர்க்க முயலும்
என் மனநிலையையும் சேர்த்து.

0

18 ஜூலை 2009

இடைவெளி

நீண்ட
இடைவெளிக்குப்
பின்
எழுதிய
கடித
மொன்றில்
பெரிதும்
மாறிப்
போயிருந்தது
கையெழுத்து
இவனைப்
போலவே.

o

ஏதும்

இத்தனை
புரியாமை
கொண்ட
வாழ்வில்
இருக்கட்டும்
எளிமையாய்
என்றிருப்பவன்
கவிதைகளை
ஏதும்
செய்யக் கூடும்
காலம்.

o

13 ஜூலை 2009

ஆரோக்கியத்தின் பாடல்

விருந்தொன்றிற்காக
கூடியிருந்த நண்பரின்
வீட்டில் வைத்து
கருவியொன்று காட்டிய
உயர் ரத்த அழுத்தத்தில்
உறைந்து போயிருந்தது
ஓர் அரை மணி நேரம்.
மீதமின்றி தீர்ந்துபோன
உணவுப்பண்டங்கள
உள்ளிருந்து சன்னமாய்
இசைத்துக் கொண்டிருந்தது
ஆரோக்கியத்திற்கான
பாடலொன்றின்
அவரோகணத்தை.


0

08 ஜூலை 2009

நடைப்பயிற்சிக் குறிப்புகள்

குறிப்பு - 1

கையில் புகையும் சிகரட்டும்
கல்தூண் சிவாஜி தொந்தியோடும்
கடந்து போகும் முதியவர்
செய்திருப்பாரா பயிற்சியென்று
ஏதாவது என்ற நினைவோடு
எட்டி நடை போடுகையில்
ஒலித்தது என் கைபேசி.

நாளை முதல் கண்டிப்பாய்
நானும் வருவேன் என்று
நெடுநாளாய்
சொல்லிக் கொண்டிருக்கும்
நாற்பதைக் கடந்த நண்பன்
இம்முறை விளித்தது
எங்கே கிடைக்கும்
தஞ்சாவூர் பொன்னி அரிசி
என்ற
தகவல் அறிய.

0

குறிப்பு - 2

யார் யாரோ அழைத்தது
இரண்டொரு முறை.

நானே எடுத்துப் பார்த்தது
நான்கைந்து முறை.

பாக்கட்டில் இருக்கிறதா என்று
பிடித்துப் பார்த்தது பல முறை.

பக்கத்தில் ஒலித்த சத்தத்தில்
பிழையாய் எடுத்தது சிலமுறை.

நாளை நடைப் பயிற்சிக்காவது
வர வேண்டும் - இந்த
நச்சுப் பிடித்த கைபேசியின்றி.

o

குறிப்பு - 3

இன்றுவரை ஏதும்
பேசியதில்லை.
இதழ்விரித்து மெலிதாய்
நகைத்ததுமில்லை.
இயல்பிலேயே
இப்படித்தானா? - இல்லை
இயல்பில்லா ஒன்றைச்
செய்வதன் பொருட்டா?
எப்படிக் கேட்க என்
சக நடைப்பயணியிடம்?
ஆரோக்கியத்திற்கான
நடைப்பயிற்சியில் ஏன்
அத்தனை கர்ண
கொடூரமாய் முகம் .

o

குறிப்பு - 4

சக
நடைப்பயணியின்
தொலைந்த
சாவியொன்றைக்
கண்டெடுத்த
சந்தோசததோடு
நிறைவுற்றது
இன்றைய
நடைப்பயிற்சி.

0

குறிப்பு - 5

இன்றைய
நடைபயிற்சியில்
இசை கேட்டபடி
ஒருவன்
இணையோடு
இடைவிடாமல்
பேசியபடி ஒருவன்
தண்ணீர் பாட்டிலோடு
வேக வேகமாய் ஒரு
வெள்ளைக்காரன்
எல்லோரோடும்
ஆனந்த கூத்தாடியாய்
அவனாகவே பாடியபடி
அதி வேகத்தில்
போய்க்கொண்டிருந்தான்
ஒருவனும்.

o

குறிப்பு - 6

அரை இருட்டான
பகுதியில்
அமர்ந்திருந்த
இருவரின் நெருக்கத்தை
சுமந்தபடி
போய்க்கொண்டிருந்த
நடைப் பயிற்சியின்
அடுத்த சுற்று
முடிந்து திரும்புவதற்குள்
முத்தமிட்டும்
முடித்திருக்கலாம்
அவர்கள்.

0

04 ஜூலை 2009

இயக்கம்

உண்ண
உழைக்க
உடைமாற்ற
உடல் தேய்த்து
குளிக்கக் கொள்ள
சபை நடுவே
கைகட்டி
கம்பீரம் காட்ட
குழுவில்
கைதட்டி
குதூகலிக்க
முகவாயில்
முட்டுகொடுத்து
முறுவலிக்க
அரிப்பெடுத்தால்
அவ்வப்போது
சொரிந்து கொள்ள
உறங்கும்போதும்
தலையணையை
கட்டியணைக்க
என்று
என்னவும் எப்பவும்
இயங்கிக் கொண்டேயிருக்கும்
நம் கைகள்
ஓய்வெடுக்கும்
திருநாள் - நாம்
ஓய்கின்ற
ஒரு நாள் தானோ?

o

01 ஜூலை 2009

யாதொரு

அகத்தின் அழகு
முகத்தில் தெரிய
அடுத்தவர் மனமறிதல்
அத்தனை எளிதா?

நேற்றின் நிழல்
கவிழ்ந்து
இடம் வலம் மாறி
தோன்றும்
யாதொரு
நிலைக்கண்ணாடி
முகத்திலும்
தெரிவதில்லை
எதிர்வரும்
எவரின்
அகத்தழகும்.

o

25 ஜூன் 2009

உயிர்த்தெழுதல்

போய்ச்சேருமிடத்தில்
புதிதாய் ஒன்று
இருக்குமென்று
ஆறுதல் சொல்லிக்கொண்டிருந்தாள்
அம்மா.

புறப்படும்போது
வாகனமொன்றில்
அடிபட்டு இறந்த
வீட்டுப் பூனைக்காக
விட்டுவிட்டு அழுதுகொண்டிருந்தான்
குட்டிப்பையன்.


பயணம் முழுதும்
அநேகர் மனதில்
மீண்டும் மீண்டும்
உயிர்த்தெழந்து
மரித்துக் கொண்டிருந்தது
அந்தப் பூனை.

o

02 ஜூன் 2009

அறிதல்

தொலைதூரத்
தொலைபேசி அழைப்புகளிலும்
அம்மாக்கள் எப்படியோ
அறிந்து கொள்கிறார்கள்
இயல்பாய்ப் பேசுவதையும்
இட்டுக்கட்டி பேசுவதையும்.

o

30 மே 2009

பேசும் மௌனங்கள்

எப்போதும்
பேசிக்கொண்டே
இருக்கின்றன
உன் மௌனங்கள்

எப்போதும்
பேசிக்கொண்டே
இருக்கிறேன்
உன் மௌனங்களோடு

எப்போதாவது
பேசிக்கொள்ளும்
நம் மௌனங்கள்
நம் இருவரையும்
புறம் தள்ளி.

0

நர்சரி வார்த்தைகள்

இன்னொரு புறம்
படுத்திருந்த
இரண்டாவது மகனை
தட்டிக் கொடுத்தபடி
இருந்தவன் காதுகளில்
இன்னமும்
ஒலித்துக் கொண்டிருக்கிறது
தட்டாதே நானே
தூங்குறேன் என்ற
மூத்த மகனின்
நர்சரி வார்த்தைகள்.

o

26 மே 2009

முரண்...

கண்களில் குளிர் கண்ணாடி
தலையில் தொப்பியோடு
பொசுக்கும் வெயிலில்
போய்க்கொண்டிருக்கிறான்
விரலிடுக்கில் புகையும்
சிகரெட் ஒன்றோடு.

o

பேருண்மை...

இன்னொரு சொகுசான
இடத்தில் சந்திப்பதை
இயல்பாய் மறைத்து
இப்போதெல்லாம் நண்பர்கள்
கூடுவதே இல்லை
என்றேன் அந்த
பழைய தேனீர்க் கடைக்காரரிடம்.
கடைசியாய் அவர்
கடையில் வைத்து
பேசிய விஷயம்
பேருண்மையைப் பற்றி
என்று ஞாபகம்.

0

25 மே 2009

முகமூடிக் கவிதைகள்...!

சூழல்கள் வேண்டும்
முகங்களை
சுலபமாய் தரிக்கும்

இவனைப்போல்தானே
இருக்கும்
இவன் கவிதைகளும்.

o

ஆக்ரமிப்பு...

புலன்களின் ஆக்ரமிப்பு பற்றி
பொருட்படுத்துவதில்லை நீங்கள்.

புலன்களின் ஆக்ரமிப்பு பற்றி
புரிவதுமில்லை உங்களுக்கு.

கேட்காத காதுகளில் கேள்வியின்றி
திணித்துக்கொண்டே இருக்கிறீர்கள்.

கண்கள் உங்களை கவனிக்கிறதாவென்று கூட
கவனிப்பதில்லை நீங்கள்.

மற்றொரு காதால் வெளியேற்றப்பட்டாலும்
மறுபடி மறுபடி வந்து ஏற்றிச் செல்கிறீர்கள்.

திறந்தபடி இந்த காதுகள் இருப்பது
திரிந்தலையும் உங்களுக்கு தோதாகவா?


o

அஞ்சல் அட்டை...

நாளேடு தொடர்கதைக்கு
அனுப்பிய ஒன்று.

நேயர் விருப்பத்திற்கு
(வானொலியில் பெயர்!)
அனுப்பிய அத்தனை
ஆசைகள்.

நேர்முகத்தேர்வுத் தகவல்கள்
நிறையவே கொண்டு வந்தவை.

திரைப்படக் கலைஞர்களிடம்
புகைப்படம் கேட்டு
எழுதியவை.

படித்ததும் கிழிக்கப்பட்ட
உத்திரகிரியைப் பத்திரிக்கைகள்.

இப்படி
எதையெதையோ
ஞாபகப்படுத்திக்கொண்டிருக்கிறது
அலுவலகக் கடித அலமாரியில்
அமைதியாய் வீற்றிருந்த - அந்த
மஞ்சள் நிற அஞ்சல் அட்டை.

O

21 மே 2009

என்றாலும்...

படிக்கவென்று
சில பிடித்த
புத்தகங்கள்

நெடுந்துயில்
கொள்ளவொரு
நீள் பொழுது

காணும்
நிகழ்வொன்றை
கவி புனைய
விழையும் மனம்

என்றாலும்
இனிப்பதில்லை
எந்தவொரு
விமானப் பயணமும்

இடையிடையே
முகம் காட்டும்
இந்த மெலிதான
மரண பயத்தில்.

o

03 மே 2009

இன்னொரு கரை...

அக்கா கொடுக்கச் சொன்னதாய்
தம்பி கொடுத்துப் போன
புத்தகத்தின் அட்டைப் பகுதியில்
வைக்கப்பட்டிருந்தது
எட்டாவது படிக்கும் பெண்
ஹெட்மாஸ்டருக்கு
எழுதிய காதல் கடிதம்.
ஆறேழு வருடங்களுக்குப் பின்
அவர்கள் இருவரையும்
அவரவர் துணைகளோடு
வைத்துப் பார்க்க நேர்ந்தது
வேறு வேறு ஊர்களில்.

காதலியின் பெயரைக்
இடதுகை மணிக்கட்டில்
தீக்கம்பி கொண்டு
திரும்பத் திரும்ப எழுதி
தீவிரமாய் காதலித்தவன்
திருச்சி பக்கம் எங்கேயோ
டிக்கெட் கிழிக்கும் பணிசெய்ய
புதுக்கருக்கு மாறாத
பொன்மஞ்சள் தாலியுடன்
இன்னொருவன் மனைவியாக
பெண்ணவளைப் பார்க்க நேர்ந்தது
பேருந்துப் பயணமொன்றில்.

மாதொருத்தியின்
மனசைத் தெரிந்து கொள்ள
மாத்திரைகள் உட்கொண்டு
மரணத்தோடு போராடி
உருத்தெரியாமல் இளைத்து
உலவிக் கொண்டிருந்தவன்
அனைவரும் வியக்கும்படி
ஆகிப் பெருகி வந்தது
அயல் தேசமொன்றில்.

நாலைந்து வருடங்கள்
நங்கை ஒருத்தியின் பால்
ஒருதலை காதல் கொண்டு
ஒருவாறு சலித்து தெளிந்து
மற்றொரு பெண்ணோடு
மணவாழ்க்கை மேற்கொள்ளும்
நண்பன் இருப்ப தந்த
நங்கையின் எதிர் வீடொன்றில்.

இன்னொரு கரை என்பதுண்டு
எல்லா ஓடங்களுக்கும்..

o

(யூத்புல் விகடன் - ஏப்ரல்)
(தமிழ் முரசு, சிங்கப்பூர் : 12-04-2009)

விரும்பாதவை...

ஆண்கள்
அபிநயிப்பது

அரிதாய்
எப்போதாவது

அனேக நேரம்
பெண்களால்

அபிநயித்துக்
காட்டப்படும

புறப்படுவதற்கு
முந்தைய

விமானப் பாதுகாப்பு
முறைகளை

எப்போதும் பார்ப்பதில்லை
இவனும்.

இன்றைக்குப் பார்க்க
நேர்ந்ததில்

எதிர்வந்து
விழுந்த

தண்ணீரில் விழ
நேர்ந்தால்

அணிய வேண்டிய
ஆடை

மூச்சுப்
பிரச்னைக்கு

மூக்கைச் சுற்றி
அணியும் மாஸ்க்

என

உபயோகிக்க
விரும்பாதவையும்

உண்டுதானே
உலகத்தில்.

o

(திண்ணை : 01-05-2009)

30 ஏப்ரல் 2009

சில சிந்தனைகள்

எல்லா௫ம்
எல்லாமும்
பெற வேண்டும்.

எனக்கு மட்டும்
சற்று கூடுதலாக.

o

தெய்வத்தால்
ஆகாதெனினும்
முயற்சி

மெய் வ௫த்திக்
கூலி த௫ம்.

o

மனைவி அமைவதெல்லாம்
இறைவன் கொடுத்த வரம்.

நல்ல மனைவியுமா?

o

மாற்றான் தோட்டத்து
மல்லிகையும் மணக்கும்.

அயல் மகரந்த சேர்க்கையை
பூக்கள்
ஆதரிக்கும் வரை.

o

தெய்வம்
நின்று கொல்லும்.

ஏன்?

o

பட்டங்களும் பட்டமும்...!

மக்கள் திலகம்
நடிகர் திலகம்
மக்கள் கலைஞர்
நவரச நாயகன்
காதல் மன்னன்
காதல் இளவரசன்
ஆக்சன் கிங்
அல்டிமேட் ஸ்டார்
உலக நாயகன்
சூப்பர் ஸ்டார்
சுப்ரீம் ஸ்டார்

நடித்துப் பெற்ற பட்டங்களுடன்
நாயகர்கள் சுவரெங்கும்

சுவரெங்கும் சுவரொட்டி
சுவரொட்டி செல்லுமவன்

படித்துப்பெற்ற பட்டம் மட்டும்
பத்திரமாய் பெட்டிக்குள்.

o

தடங்கள்

எப்போதும் போல்தான்
இருக்கிறது.
என்னையும் உன்னையும்
பிரித்த நிலா.

இப்போதும் முத்தமிட்டுக்கொண்டுதான்
இருக்கின்றன.
எதிர்வரும் அலைகளோடு
உள் வாங்கும் அலைகள்.

நீ விட்டுப்போன
தடங்களோடு நான்.
இங்கேயும் அங்கேயும்.

இன்றும் நீ வராமலே
இருந்திருக்கலாம்.
ஏனைய நாட்களைப் போல.

பிரியமான என் வேட்டைக்காரன்...!

இடதுபக்கம் மூக்குத்தி அணிந்திருப்பாள் அமுதா.
எதற்கும் வாதிடுவாள் ராதா.
சிரிப்போடுதான் பேசத் தொடங்குவாள் சுசீலா.
சிறிது கூன்போட்டு நடப்பாள் கீதா.
கண்கள் பேசும் பானுமதிக்கு.
கடைசிவரை பேசாமல்
புன்சிரிப்போடு போனவள் மோகனா.
மையிட்ட கண்கள் மாலதிக்கு.
மல்லிகைச் சரமின்றி காண்பது கடினம் நிர்மலாவை.
அபூர்வமாய் சுடிதாரில் வருவாள் ஜெயந்தி.
அடிப்பதுபோல் பேசுவாள் வசந்தி.
கேள்விகளோடே வருவாள் புவனேஸ்வரி.
துருதுருவென்றிருப்பாள் சந்திரா.

தோழியர் எல்லோர்க்கும்
வாய்த்திருக்கும்
ஒன்றிரண்டு பிள்ளைகளுடன்
ஒளிமயமாய் ஒரு குடும்பம்.

எப்படியும் வரக்கூடும்...

நாளை வரும் நாயகனுக்காய் - இந்த
நாற்பதிலும் காத்திருக்கும்
பெண்மான் எனைக் கொண்டு செல்லும்
பிரியமான என் வேட்டைக்காரன்.

தேநீர்ப் பேச்சுக்கள்...

வாராவாரம்
வாடிக்கைதான்.

நடைபாதைத் தேநீர்க்கடையில்
நண்பர்கள் கூடிப் பேசுவது.

அதிக பட்சம் உறுப்பினர்கள்
ஐந்தாறைத் தாண்டாது.

உறுப்பினர்கள் எண்ணிக்கை
ஒன்றிரண்டு கூடிக் குறையும்.

இரண்டு மணி நேரமென்று
எழுதப்படாத ஒரு கணக்கு.

வடை போண்டா தேநீரென்று
வாகாய்த் துவங்கும் பேச்சுக்கள்.

பேச்சுகளின் திசையை
பேச்சுக்களே தீர்மானிக்கும்.

அண்டம் பேரண்டம் முதல்
அரசியல் ஆன்மிகம் வரை.

பொருளாதார சிக்கல் முதல்
பெண் பொருள் தேடும் வாழ்க்கை வரை.

இவன் கவிஞன் என்றானபின்
இப்போது கவிதைகளும்.

அனல் பறக்கும் வாதங்களும்
அவ்வப்போது எட்டிப்பார்க்கும்.

பெரிதாய் ஏதும் தீர்வின்றி
பேச்சை வளர்க்கும் பேச்சுகள்.

வாராவாரம்
வா(வே)டிக்கைதான்.

நடைபாதைத் தேநீர்க்கடையில்
நண்பர்கள் கூடிப் பேசுவது.

o

சிறு கவிதைகள்

01

வந்த போதெதுவும்

சூது வாதில்லை.


போவதற்குள் எத்தனை

பொய்ப்பித்தலாட்டங்கள்?.


O

02

இன்றென்ன

கிழித்துவிட்டோம்.


நாளை மீது

நம்பிக்கை வைக்க.


O

03

இன்னொரு காதலென்றால்

இனிக்கத்தான் செய்கிறது.


இருபதிலும்

அறுபதிலும்.


O

04

நெடுநேரம் பறப்பதில்லை

நைந்த நூலில்

நாள்பட்ட காற்றாடி.


o

05

கவியெழுதி பிழைத்தல்

கடினம்.

காதலின்றி சாதல்

போல.

O

06

காதல் போயின்

இன்னொரு காதல்.


O

07

இருந்தவரைக்கும்

ஏறெடுத்துப் பார்க்கவில்லை.


போனபிறகென்ன

பொன்னாடையும்

பூமாலையும்.


O

விட்டுவிடுங்கள்...!

விட்டுவிடுங்கள்
என்னை.

உங்களின்
விளையாட்டுகளிலிருந்து.

உங்கள் விளையாட்டு விதிகளோடு ஏதும்
உடன்பாடில்லை எனக்கு.

அதிகமும் ஆசையுடன் ஆட வந்தவன்
குதூகலத்தைக் குலைத்தவை உங்கள் விதிகள்.

விளையாட்டு வினையாகும் வித்தை படித்தவனை - உங்கள்
வினையான விளையாட்டால் விலகச் செய்தவர்கள் நீங்கள்.

மேலும்

விளையாட்டை விளையாட்டாய்
விளையாடத் தெரியவில்லை உங்களுக்கு.

o

முன்வைக்கப்படும் கேள்விகளை...

எதிர்ப்படும் கேள்விகளுக்கான நம்
எதிர்வினைகள் என்னென்ன?

மற்றொரு கேள்வியை
மறுமொழியாய் தருவது.

கேள்விகளின் தரம் பற்றிய
கேள்விகளை முன்வைப்பது.

கிண்டல்கள் கேலிகள் என்று
கேள்விகளையே கேள்விக்கு உள்ளாக்குவது.

மௌனமான முகங்களால் கேள்விகளை
முற்றிலும் நிராகரிக்க முயல்வது.

வேறுவழியின்றி வெளிப்படும் நம்
விடைகளிலும் விளங்கத் தெரிவது

முன்வைக்கப்படும் கேள்விகளைப் பலரும்
முழுதாய் வாங்கிக்கொள்ளாததும்.

o

எத்தனை நாட்கள்...!

பிறந்த நாள்

பேர் வைத்த நாள்

கண்ட நாள்

கல்யாணம் கொண்ட நாள்

பிரிந்த நாள்

சேர்ந்த நாள்

சோக நாள்

சொர்க்கம் போன நாள்

நினைவு நாள்



சோற்றுக்கலையும் வாழ்க்கையில்

சொல்லிக்கொள்ளத்தான்

எத்தனை நாட்கள்.



சாஸ்வதம்...

அன்பு
பெரும்வம்பு

ஆசை
அலைக்கழிப்பு

சிற்றின்பம்
சில்லறை அவஸ்தை

பேரின்பம்
பெருங்கனவு

பெண்மனம்
புதைகுழி

பிறவி
பேரவஸ்தை

கலைகள்
காலவிரயம்

மரணம்
சாஸ்வதம்.

o

தருணங்கள்..

முன் எப்போதோ நான்
முன்வைத்த யோசனையாம்.
முற்றிலும் நினைவிலில்லை.
வாங்கிய இடமொன்று நல்ல
விலை இப்போதென்று
கண்களில் ஒளிகொண்டு
கைகளைப் பிடித்தபடி
கடைத்தெருவில் ஒரு நண்பன்.

மகனுக்கு வாங்கிவந்த
மாநிற உடைகுறித்து
மற்றெப்போதும் போலன்றி
மனம்குளிர்ந்த வாழ்த்துக்கள்
மனைவியிடம் வீட்டில்.

இயல்பாய் நிகழும்
இதுபோன்ற தருணங்களில்
இளைப்பாறி களைப்பாறும்
இல்வாழ்வின் நிகழ்கணங்கள்.


o

இன்முகம்...!

எழுத்தில் இருப்பதை
எடுத்துக் கொடுக்கும்
பணிதான்
என்றாலும்

இன்னும் கொஞ்சம்
சிரித்தபடி
இருக்கலாம்
இந்த
மருந்துக்கடை
விற்பன்னர்கள்.

0

என்ன செய்ய..?

இன்ன பிற விஷயங்களென்றால்
இழுத்துப் பிடிக்க வேண்டியிருக்க

பெண் காதல் காமம் என்றால்
பெருக்கெடுத்து ஓடி வரும்

இந்த கவிதை வரிகளை
என்ன செய்ய?


o

கவன ஈர்ப்பு...

மற்றவர் கவனத்தை
ஈர்ப்பதுதான் முக்கியம்.

இன்னபிற
ஆயிரம் வழிகளில்
நீங்கள்

என் வரைக்கும்
எழுதிக்கொண்டிருக்கிறேன்
கவிதைகளை.

o

நீர்க்கோல வாழ்வு...

எனக்குப் பிடிப்பதெல்லாம்
உனக்குப் பிடிப்பதில்லை
என்றாலும் பிடித்திருக்கிறது
உன்னை எனக்கு .

உனக்குப் பிடிப்பதெல்லாம்
எனக்குப் பிடிப்பதில்லை
என்றாலும் பிடித்திருக்கிறது
என்னை உனக்கு.

அவரவர்க்கு பிடித்தவற்றோடு
அனுதினமும் சதிராடி
நீர்க்கோல வாழ்வில் நிலைத்து
நெடும்பயணம் விழையும் மனது.

0

மாயமான் விளையாட்டு...

மகன் பிறப்பு குறித்து
நண்பன் ஒருவன்
உதிர்த்த வாசகம்:

"எப்படி இருக்கிறது
நீ படைத்த
கவிதை?"

வாகாய்க் கவிதை செய்ய
வார்த்தைகளோடு
வதைபடும்
மாயமான்
விளையாட்டுகளின்றி

இருக்கவேண்டுமே
இவன் வாழ்வாவது
என்றிருந்தது
எனக்கு.

o

சக்திக்குள்ளே சிவம்...

நாடெதுவென்றபோதும்
நாணம்கொள்ளும்
பெண்கள் அழகு
என்றெல்லாம்
எழுதி வந்தவன்
ஹரிகதா காலாட்சேபம்
சீதாக் கல்யாணம் என்று
தம்பதி சமேதராய்
தரிசனம் தருவதும்

ஒன்பது மணி நேரமும்
அலுவலகத்தில்
ஓயாமல் பேசும் நண்பனை
மனையாள் குழந்தையோடு
மார்க்கெட் ஒன்றில்
மௌனமூர்த்தியாய்
காண நேர்வதும்

தொலைதூரக் கட்டண
தொலைபேசி அழைப்புகளில்
மாதந்தோறும் அரைமணிநேரம்
மறக்காமல் பேசும் நண்பன்
இருவரி பதில்களாய்
ஈமெயில் அனுப்பத்தொடங்குவதும்

ஆகக்கூடி

சக்திக்குள்ளே சிவமென்பது
சாத்தியம்தான் போல.

0

நாற்காலிகள்...

நாற்காலிகளைப் பற்றி சொல்ல
என்ன இருக்கிறது? அவை
நாற்காலிகள் என்பதைத் தவிர.

முக்காலிகளின் இடத்தை அவை
முழுதாய் தேர்ந்துகொண்டாலும்
காலொன்று கூடுதலென்ற
கர்வமற்றவை நாற்காலிகள்

கால் உடைந்த நாற்காலிகளால்
விழுந்தெழுந்த ஓன்றிரண்டு
சம்பவங்களோடும்
நாற்காலிகளுடனான நம்
பிணைப்புகள் பெரிதும்
நம்பிக்கை சார்ந்தவை

இரண்டு கால்களால்
இயங்கி கடக்கும்
நம் காலங்களுக்கு
எப்படியும் இணையானவை.
நாற்காலிகளுடனான
நம் பொழுதுகள்

ஒன்றுக்குள் ஒன்றாய்
பிம்பங்கள் காட்டும்
சலூன் நாற்காலிகள்

அமைதியைக் குலைத்து
ஒலியெழுப்பும்
ஆஸ்பத்திரி நாற்காலிகள்

ஆட்சி அதிகாரமென்று
அமர்க்களங்களில் அடிபட்டு
உடைபடும் நாற்காலிகள்

எவர் மனதிலும்
நிழலாய் நடைபோடும்
காதலியோடு அமர்ந்த
கடற்கரை ஓர
சிமெண்ட் நாற்காலிகள்

உறவின் பிரிவுகளை
உறுத்தலின்றி பறைசாற்றும்
புகைவண்டி நிலையத்தின்
பிளாட்பார நாற்காலிகள்

எங்கும் நிறைந்து இதுபோல்
இயல்பாய் நம்மில் கலந்த
இன்னபிற நாற்காலிகள்

இருந்து இளைப்பாற
எதையெதையோ தேடி
இன்னலுறும் இவ்வாழ்வில்

இருக்கும் இடத்தினில்
இதம் தரும் - இந்த

நாற்காலிகளைப் பற்றி
நாம் என்ன சொல்கிறோம்?
அவைகளை
நாற்காலிகள் என்பதைத் தவிர.

o

பூனைகள்...

பூனைகளுக்கென்று பொதுவாய்
புகலிடங்கள் ஏதுமில்லை.

பூனைகள் பொதுவில் வாழும்.
பூனைகள் கூட்டமாய் திரிதல்
பொதுவினில் காண்பதரிது.

பூனைகள் தனித்தும் வாழும்.

வசிக்குமிடம் பற்றியெதுவும்
வரையறைகள் பூனைகளுக்கில்லை.

தகிக்கும் சூழலில் தனித்து
தாழ்தள இடங்களில் நிற்கும்
கார்களுக்கிடையே வாழும்

பூனைகளுக்கென்று பொதுவாய்
புகலிடங்கள் ஏதுமில்லை.

நிலை குத்தும் பார்வை கொண்டு
நெருங்கும் வரை நின்று வெறிக்கும்.

நேரெதிரே குதித்துக் கடக்கும்
நெடுஞ்சாலை வாகனங்களுக்கிடையில்

இருத்தல் இறத்தல் குறித்தெந்த
முகாந்திரமின்றி முடிந்து போகும்

பூனைகளின் எளிய வாழ்வு.

0

உறுத்தல்...!

இருந்தபடியேதான் இருந்தாள்
அந்த எழுபது வயதுக் கிழவி.

வருவோர் போவோர் தரும்
இரண்டிரண்டு பிஸ்கட்கள்

அவ்வப்போது யாராவது தரும் - ஒரு
அரை டம்ளர் தேநீர் சகிதம்

அந்த வங்கி வாசல் தேநீர் கடை
அவளின் வாடிக்கை வாழ்க்கை போல.

இடது கையில் இரண்டாயிரம்
சொச்ச விலை ஷூவுடன்

இருந்தேன் நானும் அந்த
இடத்தில் ஒரு தேநீருடன்.

ஒன்றிரண்டு நிமிடங்கள்
ஒருவாறாய் சிந்தித்தவன்

பர்சில் பளபளத்த
பல வண்ண நோட்டுக்களில்

ஒரு நூறைக் கொடுத்துவிட்டு வந்து
ஒரு வாரம் ஆன பின்னும்

குனிந்து அணியும்போதெல்லாம்
இன்னமும் உறுத்திக்கொண்டுதான் இருக்கிறது
இந்த
இரண்டாயிரத்து சொச்ச விலை ஷூ.

o

உதவும் பொருட்டு...

லிப்டில்
ஏறிய ஒருவனுக்கு
உதவும் பொருட்டு
விரைவாய் மூடும்
பொத்தானை அழுத்தினேன்.
அதுவரை பேசிக்கொண்டிருந்த
அவன் அலைபேசியின்
தொடர்பு விட்டுப் போனது.

o

சாயல்...

இரு தளங்களுக்கிடைப்பட்ட
படிக்கட்டுகளில் வைத்து
காதலைச் சொன்ன கணம்
விழிகள் உருட்டி
மருண்ட உன் முகத்தின்
சாயலேதுமின்றி
இருந்தது
பிரிவதற்காய் நாம்
தேர்ந்து கொண்ட ஒரு
பிற்பகல் வேளையில்
மூடிய லிப்டின் கதவுகள்
உள் வாங்கிப்போன
உன் முகம்.

0

எதைச் சொல்வீர்கள்?...

ஆசையே துன்பத்துக்கு
காரணம் என்று புத்தன்

ஆசைப்படாதவற்றால் ஆகிவராது
துன்பம் என்பது வள்ளுவன்

பலனை எதிர்பார்க்காதே
பகவான் கீதையில்

இங்கேயே இப்பொழுது
இரு என்று ஓஷோ

பற்றற்று இரு என்று
பலப்பல ஞானிகள்

எதைத் தின்றால்
பித்தம் தெளியும்

என்றிருப்பவனுக்கு
எதைச் சொல்வீர்கள்?

0

நீளும் விரல்கள்...

அவன்
அப்படித்தான்

என்றபடி
இல்லாமல்

எதையும்
எதிர்ப்பான்

என்பதும்
இன்றி

எதுவும்
செய்யக்கூடும்

என்பதாய்
இருக்கும்

பிம்பத்தை நோக்கி
நீள்வதில்லை

பிறிதொரு கையின்
விரல்கள்.

புறங்கூறுதல்
பொருட்டோ

எடுத்து
ஆண்டபின்

எளிதாய் ஏய்ப்பதின்
பொருட்டோ.

o

என் கவிதைகள்...!

பெரும் மமதைக்காரனென்று சொல்.
பித்தலாட்டக்காரன் என்று சொல்.

சிற்றின்பப்பிரியன் என்று சொல்.
சின்னபுத்திக்காரன் என்று சொல்.

சீதாராமன் இல்லை என்று சொல்.
சிறுவயதுப் பிழைகள் எல்லாம் சொல்.

மதுபுகைக்கு அடிமை என்று சொல்.
மனிதனே இல்லை என்று சொல்.

என்னை
என்ன வேண்டுமானாலும்
சொல்.

என் கவிதைகளும்
என் போல்தானா?
சொல்.

o

பேச்சுத்துணை...

கடிமணம் வாழ்வில்
கட்டாயத் தேவையா
யென்றெல்லாம்
கடிவாளமிட்ட மனதோடு
ஒத்தையில் இருந்தவனை
ஒருவாறு பேசிச் சரிகட்ட
நான் உட்பட
நண்பர்கள் பலரும்

எடுத்துச்சொன்ன பலவற்றில்
ஏகோபித்த ஒன்று
பின்பகுதி வாழ்க்கையில்
பேச்சுத்துணைக்கென்றாவது
பெண்ணொருத்தி வேண்டுமென்பது.

மணமாகிச் சில
மாதங்கள் கழித்து
எதேச்சையாய் எதிர்ப்பட்டவனிடம்
எப்படிப் பேச்சுத்துணை என்றேன்.


எரிக்கும் பார்வையொன்றை வீசி
எதுகை மோனையாய் சொல்லிப்போனான்:

எப்போதும் பேசிக்கொண்டே அவள்.
எதிர்ப்பேச்சின்றி துணையாய் நான்.

0

'போல்'களின்றி...

முதல் மகன்
பிறந்ததும்
மூக்கும் முழியும்
என்போல்
என்றார்கள்.
மூன்று வருடங்களில்
முகம் காட்டிக்கொடுத்தது
முழுவதும் மகன் ஜாடை
மனைவியின் ஜாடை
என்பது.
இப்போது
இரண்டாமவன் பிறந்ததும்
இவனும் என்போல்
என்றே பேச்சுக்கள்
எதிர்வந்து
விழுந்தவண்ணம்.

'போல்'களின்றி
பார்ப்பதில்லை போல
எதையும் எவரும்.

o

29 ஏப்ரல் 2009

குழந்தைக் கேள்விகள்..!

ஏன்
வீடு திரும்ப வேண்டும்?

ஏன்
சக்கரங்கள் சுழல்கின்றன?

ஏன்
அம்மா வேலைக்கு போவதில்லை?

எங்கே போய்க்கொண்டிருக்கிறார்கள்
எல்லோரும் இத்தனை வாகனங்களில்?

வளர்ந்த பின் தான்
வேலைக்கு போகணுமா?

சாலையோர பூனைகளுக்கு
யார் சாதம் தருவா?

குழந்தைத்தனமாகவே இருப்பதில்லை
எப்போதும்
குழந்தைகளின் கேள்விகள்.

o

இசைவாய்...!

அனேக நேரங்களில்
அடித்துப் பிடித்து ஓடி வரும்
ஒருவனுக்கோ ஒருத்திக்கோ
காத்திருக்க முடியாமல்
விரைவாய் மூடிக்கொள்ளும் லிப்டில்
வெறுமனே இருக்க நேர்கிறது.

யாசிக்கும் கைகளுக்கு
யோசித்துக் கொடுப்பதற்குள்
பெரும்பாலும் நகர்ந்துவிடும்
பேருந்துகளிலும்
இருக்க நேர்கிறது.

முன்பைவிட விரைவாய் நகரும்
இவன் விட்டு நகர்ந்த
வரிசைகளையும்
எப்போதும் காண நேர்கிறது.

வேண்டாத நேரங்களில்
வெறுமனே இருக்கும்
சலூன் நாற்காலிகளையும்
காண நேர்கிறது
கணக்கற்ற பொழுதுகளில்.

எதிர்பாராப் பொழுதொன்றில்
இசைவாய் நிகழும் ஒன்றும்
இவளது வருகையைப் போல.

o

வேறு ஒன்றும்...

இன்னொரு முறை
பத்திரமாய்
தரையிறக்கித்
தரப்பட்டிருக்கிறது
இந்த வாழ்வு
என்பதைத் தவிர

வேறு ஒன்றும்
விசேசமாய்
சொல்வதற்க்கில்லை
இந்த இன்னொரு
விமானப் பயணம்.

o

கண்டதும் காணாததும்...

சிக்னலில் கடந்து போன
பெண்ணின்
முகம் உருவம் எல்லாம்
மறந்துபோய்
சாலையைத் துடைத்தபடியே போன
அவளின்
சிவப்பு நிற துப்பட்டா மட்டும்
துல்லியமாய் கண்முன் இன்னமும்.



எப்படிக் கொண்டு சேர்க்க?
காலையில் வீதியில் கண்ட
அந்த ஒற்றைச்சாவியை
அதற்கு உரியவனிடம்.

o

சிதறும் பிம்பங்கள்..

எனக்கான பிம்பத்தை நீ
எது எதற்கோ உடைப்பதுவும்

உனக்கான பிம்பத்தை நான்
உள்வைத்தே உறைவதுவும்

இழுத்துப் பிடித்திருந்தால்
இன்னும் கூட வாழ்ந்திருக்கும்

பிம்பங்களில் நிலைப்பதில்லை
பேரன்பும் பெருவாழ்வும்.

o

இன்னும் கொஞ்சம்...!

இன்னும் கொஞ்சம்

அன்போடு

இருந்திருக்கலாம்

இவள்.



இன்னும் கொஞ்சம்

இயல்போடு

இருந்திருக்கலாம்

இந்த உறவுகள்.



இன்னும் கொஞ்சம்

இசைவாய்

இருந்திருக்கலாம்

இந்த நண்பர்கள்.



இன்னும் கொஞ்சம்

இலவம்பஞ்சாய்

இருந்திருக்கலாம்

இந்த மனசு.



இதுபோல் இன்னும்

இன்னும் கொஞ்சங்களில்

இந்த வாழ்வு.



இன்று...

இன்று
சமையல் கியாஸ்
தீர்ந்து விட்டது.
இன்று
மார்கழி மாதக் குளிர்
சில்லிட்டு இருந்தது.
இன்று
சாலையில் பார்த்த
ஒருவன் இடதுகண் மூடிக்
கட்டுப்போட்டிருந்தது.
இன்று
(இதுவரை சிரிக்காத)
நண்பன் ஒருவனின்
இடைவிடாத சிரிப்பைக்
காண நேர்ந்தது.
இன்று
வந்த கடிதமொன்றில்
நண்பன் தன்
முதல் மனைவியின்
நினைவு நாள்
நாளை என்று
எழுதியிருந்தான்.
இன்று
எழுத முயன்ற
கவிதையில்
பெரிதும் சோகம்
கவிழ்ந்தது.
இன்று
இந்தக் கவிதை
தானே தன்னை
எழுதிக் கொண்டது.

o

வன்கொடுமையில் வாழும் மனது...

பூமலரும் பொழுதுகளில்
புல்லாங்குழல் இன்னிசையில்
பனித்துளியின் புதுப்பொலிவில்
பேரின்பப் பெருவெளியில்
வெண்ணிலவின் தண்ணொளியில்
பெண்ணவளின் கண்ணசைவில்
கொடியிடையின் நடையழகில்
இடைதாண்டும் ஜடையழகில்
மின்மினியின் கண்சிமிட்டலில்

வந்து விழும் வரிகள் அறியா(து)
வன்கொடுமையில் வாழும் மனது.

o

தானாய் விழும் அருவி...

கண்கூசும் வண்ண ஒளி மேடையில்
களைகட்டத் தொடங்கி இருந்தது கச்சேரி.

நெடுநாள் கழித்துப் பார்க்கும்
நண்பர்களின் நலம் விசாரிப்புகள்.

புடவை நகை பற்றிப் பேசவென்றே
புறப்பட்டு வந்திருந்த பெண்கள்.

நாற்காலிகளுக்கு இடைப்பட்ட
நடைபாதைப் பாய்விரிப்பில்
உறங்கிப்போன மகனை கிடத்திவிட்டு
உள்வரிசை நாற்காலி ஒன்றிலிருந்து
மகன்மேல் ஒரு கண்ணோடு
மடிமேல் தாளமிட்ட மங்கை.

குளிர்சாதனங்களின் அளவை குறைத்தபடி
அரங்கெங்கும் நடந்தபடி இருந்த
அவனது இசைகேட்டல் எப்படி இருக்கும்?

ஆரம்பமுதலே அடிக்கடி கைபேசியில்
கைதட்டல் சத்தத்தை யாருக்கோ
கேட்கச் செய்துகொண்டிருந்தவனின்
இசையார்வத்தை எதில் சேர்க்க?

எப்பொழுதும் நிகழக்கூடும்
இவளின் அழைப்பை எண்ணி
கைப்பேசியைப் பார்த்தபடி இவனும்.

தன்னளவில் எதற்கும் பொதுவாய்
தானாய் விழும் அருவியென
ததும்பிக்கொண்டிருந்தது இசையெங்கும்.


o

எப்படி இருந்திருக்கக்கூடும்?...

ஜன்னலோரப் புறாக்களின்
சிறகடிப்போடு
புலர்ந்ததந்த காலைப் பொழுது.

முதல் அழைப்பிலேயே
கண்விழித்து
முகம் பார்த்து சிரித்த மகன்.

பையனை ஏற்றிவிட்டுவந்த
பள்ளிக்கூடப் பேருந்தில்
சிரித்த முகங்களோடு
சீருடைச் செல்லங்கள்.

எப்போதும் போலன்றி
இவளும்
இன்முகம் கொண்டொரு சிரிப்புடன்.

வழியெங்கும் நெரிசலின்றி
வரவேற்ற வழக்கமான சாலை.

அவனது அலுவலக
அடுக்குமாடி கட்டிடத்தின்
அடுத்தொரு மாடியில் நிகழ்ந்த
இவன்வயது இளைஞன் ஒருவனின்
மாரடைப்பு பற்றிய செய்தி
வந்து சேர்ந்ததும்
அந்த ஒரு காலைப் பொழுதில்தான்.

எப்படி இருந்திருக்கக்கூடும்
அவனின் காலைப்பொழுது?

o

சொல்லுதல்.....!

சிலதை
சொல்லத் தெரியவில்லை.
சிலதை
சொல்வதா தெரியவில்லை.

சிலதை
சொல்வதற்கில்லை.
சிலதை
சொல்லித் தெரிவதில்லை.

சிலதை
சொல்லாமல் இருக்க முடிவதில்லை.
சிலதை
சொல்லி ஒன்றும் ஆவதில்லை.

சிலதை
சொல்வதால் பெரும் தொல்லை.

இப்படிப் போகும்
சிலதை
எப்படி முடிக்க
என்றும் தெரியவில்லை.

0

அந்தரங்கம்...

இருவர் பேசிக்கொண்டிருந்த
இடத்தருகே
எதேச்சையாய் போய் நின்றேன்.
அப்படியே பேச்சு நின்று
அமல்படுத்தப்பட்டது அமைதி.

இன்னொருவனுக்கு
அனுமதியில்லாத
இருவரின் அந்தரங்கத்தின்
இடையே புகுந்ததறிந்து
வெறுமே சிரித்துவைத்தேன்
வேறெதுவும் தோன்றாமல்.

0

உங்களை என்னைத் திரும்பிப் பார்க்க

அச்சில் வந்த
கவிதைகளைப் பற்றி
அதிகமாய்
நீங்கள் என்ன சொல்கிறீர்கள்?

காதல் தவிர்த்து
எழுதலாமே என்கிறீர்கள்.
கவிதையைப் பற்றி
எழுதுவதை தவிர் என்கிறீர்கள்.

இத்தனை கவிதைகளா
இதற்குள் என்கிறீர்கள்.
இத்தனைக்கும் எப்படி
நேரம் என்கிறீர்கள்.

இன்ஸ்பிரேசன் இதற்கெல்லாம்
எது என்கிறீர்கள்?
உணர்வுதளம் தாண்டி
ஒன்றும் வரவில்லை என்கிறீர்கள்.

அச்சுநேர்த்தி பற்றியும்
அதிகம் சொல்கிறீர்கள்.
அடர்த்தி இன்னமும்
வேண்டும் என்கிறீர்கள்.

செய்த கவிதைகளே
நிறைய என்கிறீர்கள்.
அதிகமும் படித்தல்
ஆகச் சிறந்தது என்கிறீர்கள்.

எதையும் வாய்மொழியாய்
சொல்வதற்கில்லை நான்.

என்னைத் திரும்பிப் பார்க்க வைக்கும்
கவிதை ஒன்றை
எழுதிவிட்டு வந்து உங்களை
எதிர்கொள்ளவே ஆசை.

o

பிரிவின் சாசனம்...

ஏதாவது சொல் என்றேன்
என்ன சொல்ல என்றாய்?
எதையாவது சொல்லி
இருக்கலாம் நீ.

பிரிவின் சாசனமாய்
ஒரு பதிலாவது
எஞ்சியிருக்கும்
நமக்குள்.

o

இருப்பு...

எப்படி இருக்கிறாய் என்றாய்.
அப்படியேதான் இருக்கிறேன்
என்றேன்.

இப்படி உன் விழிகள் விரிய
அப்படியே இருத்தலென்பது
அத்தனை சிரமமா என்ன?

o

28 ஏப்ரல் 2009

இயல்பு..

என்னாயிற்று என்றேன்.
எதுவுமில்லை என்றாய்.
பின் எதையும்
கேட்கவில்லை நான்.

இயல்பின்றி போவதில்
சம்மதமில்லை எனக்கும்.

0

நினைவடுக்கில்...

நினைவடுக்கிலிருந்து
நிகர் சாயலொன்றை
வெளிக்கொணரும்
எதிர்ப்படும் ஏதோ
ஓர் முகம்.

எங்கேனும் இருக்கக்கூடும்
எனக்கான சாயலொன்றும்
எவரோ ஒருவரின்
நினைவடுக்கில்.

o

கவிதையை முன்வைத்து...

நர்சரி படிக்கும் மகன்
இன்று விளையாட தேர்ந்து கொண்டது
நான் வாசிக்க வைத்திருந்த
கவிதைப் புத்தகங்களில் ஒன்றை.

தொலைதூர பயணமொன்றில்
டேப் ரெகார்டரில் ஒலித்த
பாடலின் வரிகள்
எங்கோ படித்த கவிதை வரிகளின்
இன்னொரு வடிவம்.

முதல் முதல் பார்த்த
தோழியின் கணவரிடம்
சகஜமாக உரையாட முடிந்தது
என் முதல் கவிதைத் தொகுதியை
முன்வைத்து.

மகன் பிறந்த நாள்
கொண்டாண்டத்தின் இடையில்
நண்பனின் மனைவி ஒருவர்
நான் எழுதிய கவிதை ஒன்றை
வரி மாறாமல் சொல்லி
வாழ்த்தியது பாராட்டுமுகமாய்.

நிகழ் கணங்கள் யாவிலும்
நிறைந்து நடை பயிலும்
கவிதையின் கால்தடங்கள்

o

பிறப்பு...

அந்த
மகப்பேறு மருத்துவமனையில்
மாதாந்திரப் பரிசோதனைக்காக
மனைவியோடு போய்வருகையில்
பார்த்த முகங்களில்
ஒன்று
இன்று எதிர்ப்பட்டது லிப்டில்
கணவன் சகிதமாய்
கைகளில் ஏந்திய சிசுவோடு.
சுகப்பிரசவம் நேற்று என்று
யாரிடிடமோ
சொல்லிக்கொண்டிருந்தவனின்
தோள்களைப் பற்றியபடி
இருந்தவளின் முகத்தில்
சுமையொன்று இறங்கிய
சோர்வும் களைப்பும்.
பேச்சின் தொடர்ச்சியாய்
வந்து விழுந்தது
ஏழு வருடங்களுக்குப் பின்
பிறந்த முதல் பிள்ளை என்பது.
அதுவரை வாடியிருந்த
அவளின் முகமும் கண்களும்
அங்கிருந்த அனைவருக்கும்
பொதுவாய்
வெளிப்படுத்திய ஒரு மலர்ச்சி.
இந்த கவிதை பிறந்து
புறப்பட்டது அந்த ஒரு
மலர்ச்சிப் பிரகாசத்தில்தான்.

o

களவு...

௧ளவு போனது.

கரையோரம் இருந்த
கடிகாரத்தோடு

அருவிக்குளியல்
தந்த ஆனந்தமும்.

0

கொஞ்சமும்...

கொஞ்சமும்
எதிர்பார்த்திருக்கவில்லை
தேநீர்க் குவளையை
வைக்கும் ஸ்டாண்டாக
ஒரு கவிதை புத்தகத்தை
வைத்திருப்பார்
அந்த புத்தகக் கடைக்காரர்
என்று.

o

இன்னபிறவும்....

அநேகமாய்
முடிவதில்லை.

அழகைப் பற்றிய
அவதானிப்பை

அப்படியே
கைமாற்றிவிட.

அதிகபட்சம்
முடிவதெல்லாம்

அதைப்போல
இது என்பதாய்

இன்னொன்றை
இணையாய்ச் சொல்லி

இப்படித்தான்
இருக்கிறது

இன்னபிறவும்
இவ்வாழ்வில்.