![](https://blogger.googleusercontent.com/img/b/R29vZ2xl/AVvXsEjw4_Vve3P9_5pAtFWks_c_oFPmLbgRSH5ajFz8nZu-B2LUtZ0Lgno1RmPCHamgsaGD-DIDW3lir0V5vA0gBaxSMZx58QtszzkSRp-52sYQHxs5qp9ei1-7CtqUv6o7_YPz6_Frxr1O8HGG/s320/selvaraj+IP.jpg)
நீலம் சிவப்பு மஞ்சள் சரி
நிச்சயமாய் பச்சை வேண்டாம்
அன்றைய கட்டளை
உடைந்துபோன ஹெலிகாப்டர் பொம்மைபோல்
இன்னொன்று வாங்கி வரவேண்டுமென்பது.
அலுவல் களைப்போடு நுழைந்த
மறதி முகத்தை நோக்கிய
எதிர்பார்ப்பின் கண்களிடம்
பச்சை மட்டுமே இருந்ததாய்
அன்போடு கட்டிப் பிடித்தேன்.
அவ்வளவு தூரம் போனதுக்கு
அதையே வாங்கி இருக்கலாமே
என்றவனின் சொல்லிலிருந்து
எது எதுவோ இழை பிரிந்தபடி.
o
எவ்வளவு தூரத்தையும்
அது நீங்கள்தானென
அறுதியிட முடிந்தது.
அழைத்துப் பேசும் தூரத்தை
அவ்வளவு நீளம் போல்
காட்டிக்கொண்டிருந்தது
அடுத்த ஐந்து நிமிடங்களில்
அப்பாயின்மென்ட்டோடு
காத்திருந்த மருத்துவரின் இருப்பு.
அதனாலென்ன?
இன்னுமதிக தூரத்தையும் கடக்கக்கூடிய
விஷயங்களோடு
இன்னோர் பொழுதில் சந்திப்போம்.
o
(28 -02 -2011 உயிரோசை மின்னிதழில் வெளியானது)