குறுங்கவிதைகள்

பேருந்தின் இரைச்சல் ஓசையில்
பேச்சு வராத தமையனைப் பற்றி
ஓயாமல் பேசிக்கொண்டு
வந்தாள் ஒருத்தி.
எனக்கென்னவோ அவளே
அவனுக்கும் சேர்த்து
பேசிக்கொண்டிருப்பது போல்
இருந்தது.

0

ஒன்றே போல்தான்
உன் குழந்தை
கைகளின் ஸ்பரிசமும்.

O

கண்கள் சொருகும்
அதிகாலைப் பொழுதில்
உதட்டுச் சாயத்தை
ஒத்தி ஒத்தி எடுத்து
உதடுகளால்
சப்பிக் கொண்டிருந்த
ஒருத்தியைக் காண
ஒரு மாதிரி
சந்தோசமாய்தான்
இருந்தது.

O

பின்னிருக்கையில் அமர்ந்தபடி
பயணம் போக நேர்ந்த
வண்டியோட்டியின் ஆச்சர்யம்
வழியெங்கும் காணும்
இத்தனையும்
இத்தனை நாளாய்
இங்கேதான்
இருந்ததா?

O

ஒன்று போலே இருந்த
எட்டாவது முகத்தை
பார்த்தேன் இன்றைக்கு.

O

இந்த வார (23-11-2011) விகடனில் கவிதை

இந்த வார ஆனந்த விகடன் (23-11-2011) இதழில் வெளியான கவிதை.
(கவிதையை படிக்க ‘க்ளிக்’ செய்யவும்)

எதிர் விளையாட்டு

இடைவேளை நேரங்களில்
பள்ளியில் விளையாடும் ஒரு
விளையாட்டின் பெயர்
‘எதிர் விளையாட்டு’
என்றான் மகன்.

‘சிரி என்றால் அழ வேண்டும்
அழு என்றால் சிரிக்க வேண்டும்
உட்கார் என்றால் எழ வேண்டும்
எழுந்திரு என்றால் உட்கார வேண்டும்.’

அனேகமாய் எல்லா நேரங்களிலும்
அவனே ஜெயிப்பதாய் அடிக்குறிப்பு வேறு.
அட்டகாசம் என்று தட்டிக் கொடுத்தவன்
அடியோடு அதை மறந்தே போனேன்.

அடுத்த நாள் வந்த ஸ்கூல் டைரியில்
எழுதப்பட்டிருந்தது.
'பேசாதே என்றால் வகுப்பில்
பேசிக் கொண்டே இருக்கிறான்’
என்று.

o

கொடைக்கானல்

பூத்துச் சிரிக்கும்
பல வண்ணப் பூக்களுடன்
புகைப்பட புன்னகைகள்.
உச்சியை உரசும் பனிப்பொழிவுடன்
உன்மத்தம் பிடித்த
மேகக் கூட்டங்களின் களியாட்டங்கள்.
தடையின்றி ஓடும்
சைக்கிள்களின் பின்னே
தம் பிள்ளைகளின்
பின்னோடும் அப்பாக்கள்.
தண்ணீர்ப் பூக்களின்
பரஸ்பர பரிமாறல்களுடன்
கூச்சலிடும் குழந்தைகளின்
குதூகலத்தை ரசித்தபடி
தள்ளாத வயது படகோட்டி.
போய் வரலாம்
என்றெண்ணும் உங்களிடம்
பொதுவில் வைக்க
இன்னும் பல உண்டெனினும்
குறிப்பாய் ஒன்று.
திடுமென்று தாவிக்குதித்து
தின்பண்டங்கள் எதையும்
குழந்தைகளிடமிருந்து
பறித்துப் போகும்
மந்திகளைக் கொஞ்சம்
மனதில் வைத்தால்
இடைச்செருகலாய்
இந்த மந்திகளின்றி
நினைவோடையில் தங்கும்
நீங்கள் போய் வரும்
உல்லாசப் பயணம்.

o
(நன்றி: சொல்வனம்)

ஆசை முகம்

சுழல் வட்ட மேஜை
சுருங்கிய மஞ்சள் ஒளி
சுவைத்த உணவின்
நறுமணச் சுவை.
இவ்வளவு நீண்ட
வருடங்களின்
இடைவெளிக்குப் பின்னும்
சன்னமாக நினைவில்.

சூரிய ஒளியின் இந்த
நிச்சலனப் பொழுதில்
எள்ளளவும்
எதிர்வராமல்
உன் முகம்.

உண்மையில் இருந்ததா
உனக்கு
அசலாய் ஒரு முகம்
அன்றைக்கு?

o

இந்த வார விகடனில் கவிதை

இந்த வார ஆனந்த விகடன் (05-10-2011) இதழில் வெளியான கவிதை.
(கவிதையை படிக்க ‘க்ளிக்’ செய்யவும்)

'கல்கி'யில் ஒன்பதாவது கவிதை

இந்த வார கல்கி (02-10-2011) இதழில் வெளியான கவிதை.
(கவிதையை படிக்க ‘க்ளிக்’ செய்யவும்)